لاہور(رپورٹنگ آن لائن) وزیراعلی پنجاب مریم نواز شریف نے آئین کی بالادستی، قانون کی حکمرانی اور عوامی فلاح و بہبود کے لیے تمام جمہوری قوتوں پر مل کر کام کرنے پر زور دیا ہے۔پارلیمانی نظام کے عالمی دن کے موقع پر اپنے پیغام میں مریم نواز شریف نے پارلیمانی نظام کے عالمی دن پر تمام جمہوری قوتوں کو مبارکباد دیتے ہوئے کہا کہ اس دن کا مقصد عوامی حقوق کے تحفظ اور پارلیمانی روایات کی پاسداری کو فروغ دینا ہے۔
ان کا کہنا تھا کہ پارلیمانی نظام ہی ایک مستحکم، خوشحال اور ترقی یافتہ پاکستان کی ضمانت ہے، جبکہ پارلیمان کی بالادستی، آئین کی حکمرانی اور جمہوری اقدار کا فروغ ملک کی ترقی کے لیے ناگزیر ہے۔مریم نواز شریف نے کہا کہ پارلیمانی نظام عوام کے مسائل کے حل اور ان کی آواز کو فیصلہ سازی کا حصہ بنانے کا مثر ترین ذریعہ ہے، جبکہ قانون سازی کے ذریعے انسانی حقوق کے تحفظ اور عوام کے بنیادی حقوق کی فراہمی جمہوریت کا بنیادی ہدف ہے۔انہوں نے کہا کہ پارلیمان محض قانون ساز ادارہ نہیں بلکہ قوم کی سوچ، دانش اور مستقبل کی سمت متعین کرنے والا معتبر ادارہ ہے، معاشرے کے تمام طبقات، خصوصا خواتین اور نوجوانوں کی موثر نمائندگی جمہوری نظام کو مزید مضبوط بناتی ہے۔
وزیراعلی نے مزید کہا کہ پاکستان مسلم لیگ ن آئین کی بالادستی، جمہوریت کے استحکام اور شفاف حکمرانی پر یقین رکھتی ہے، جبکہ قائد محمد نواز شریف کی قیادت میں پنجاب میں گڈ گورننس، موثر قانون سازی اور عوامی فلاح کے لیے کوششیں جاری ہیں۔
