کراچی(رپورٹنگ آن لائن)پی ایس ایل 11 میں حیدرآباد کنگزمین کے نوجوان کھلاڑی معاذ صداقت نے کہاہے کہ ٹورنامنٹ میں بقا کے لیے اب باقی میچ بھی جیتنا ضروری ہیں۔حیدرآباد کنگزمین کے اوپنر بیٹر معاذ صداقت نے میڈیا سے گفتگو کرتے ہوئے کہا کہ خوشی ہے کہ ٹیم کو پہلی کامیابی حاصل ہوئی ہے، مڈل اوورز میں ہونے والی غلطیوں پر کام کیا ہے جس کا فائدہ ہوا۔
انہوں نے کہا کہ پلان کے مطابق ابتدائی میچز میں نتائج نہیں دے سکے تھے لیکن اس میچ میں ٹیم نے اچھی کارکردگی دکھائی ہے۔کنگزمین کے بیٹر نے کہا کہ میں خود کو بطور آل راؤنڈر دیکھتا ہوں، کمر کے درد کی وجہ سے بولنگ نہیں کررہا تھا اب شروع کردی ہے، کپتان سے مشاورت کے بعد بولنگ کے شعبے میں حصہ لیا۔معاذ صداقت نے کہا کہ ٹیم میں شامل غیرملکی کھلاڑیوں کے ساتھ بہت اپنائیت محسوس ہوتی ہے۔
