اسلام آباد (رپورٹنگ آن لائن)وفاقی وزیر برائے اوورسیز پاکستانیز و ترقی انسانی وسائل چوہدری سالک حسین کی زیر صدارت اجلاس ہوا جس میں بیرون ملک روزگار کے لیے جانے والے افراد کو ایئرپورٹس پر آف لوڈ کے واقعات کا نوٹس لیا گیا۔ اجلاس میں ڈائریکٹر جنرل ایف آئی اے رفعت مختار نے خصوصی شرکت کی۔ وفاقی وزیر کو مختلف ایئرپورٹس پر ورکرز کو آف لوڈ کرنے کے واقعات پر بریفنگ دی گئی۔
وزارت سے جمعرات کو جاری پریس ریلیز کے مطابق اجلاس کے شرکا سے گفتگو کرتے ہوئے وفاقی وزیر نے کہا کہ ورک ویزا اور پروٹیکٹر سرٹیفیکیٹ کے باوجود مختلف ایئرپورٹس پر ورکرز کو آف لوڈ کیا گیا، بیرون ملک روزگار کےلئے جانے والے پاکستانی ہمارے لیے انتہائی قابل عزت ہیں کسی کو ورکرز کو غیر قانونی طور روکنے کی اجازت نہیں دیں گے، اوورسیز پاکستانی ملکی معیشت کو چلانے کےلئے زرمبادلہ پاکستان بھجواتے ہیں۔ وفاقی وزیر نے ڈی جی ایف ائی اے کو ایئرپورٹس پر ورکرز کو آف لوڈ کرنے کا معاملہ فوری حل کرنے کی ہدایت کرتے ہوئے کہا کہ آئندہ کسی ورک ویزہ ہولڈر کو ایئرپورٹ پر آف لوڈ نہیں کیا جائے گا۔
ڈائریکٹر جنرل ایف آئی اے رفعت مختار نے بتایا کہ لاہور اور کراچی ایئرپورٹ پر ورکرز کو آف لوڈ کرنے کے واقعات رپورٹ ہوئے جن کی تحقیقات جاری ہیں، اگر ایف آئی اے اہلکار ملوث پائے گئے تو سخت کاروائی کی جائے گی۔ ان کا کہنا تھا کہ ورک ویز پر بیرون ملک جانے والوں کے لیے ایف آئی اے کی جانب سے کوئی نئی شرائط لاگو نہیں کی نہ ہی سرکاری افسر سے بیان حلفی لینے کی کوئی نئی شرط عائد کی گئی ہے۔
انھوں نے کہا کہ جلد نیا ڈیجیٹل نظام متعارف کرارہے ہیں جس کے ذریعے ورکرز روانگی سے قبل ہی اپنی امیگریشن آن لائن مکمل کرسکیں گے۔چوہدری سالک حسین نے کہا کہ مستقبل میں اس طرح کے واقعات کو روکنے کےلئے وزارت اوورسیز پاکستانیز اور ایف آئی اے حکام ایس او پیز تیار کر رہے ہیں۔ اجلاس میں سیکرٹری وزارت اوورسیز پاکستانی ندیم اسلم چوہدری اور پاکستان اوورسیز ایمپلائمنٹ پروموٹرز ایسوسی ایشن کا وفد بھی موجود تھا ۔
