کراچی(رپورٹنگ آن لائن) مسلم لیگ ن کے رہنما و سابق وزیر اعظم شاہد خاقان عباسی نے کہا ہے کہ وفاقی وزرا بتائیں انہوں نے بے عزتی کرنے کے علاوہ کون سا کام کیا ہے ؟، چینی 300 اور گندم کی کرپشن 400 ارب سے اوپر چلی گئی ، عوام کی جیب سے پیسہ جا رہا ہے لیکن کوئی پوچھنے والا نہیں ،جس آدمی کا کردار ہی نہ ہو اس کے الزام پر کمنٹ نہیں کرتا ۔
کراچی میں میڈیا سے گفتگو کرتے ہوئے شاہد خاقان عباسی نے کہا کہ ملک کو چلانے کے لیے قومی احتساب بیورو (نیب) کو ختم کرنا چاہیے اور ہمیں آئی جی سندھ کے اغوا سے متعلق ازخود نوٹس کا انتظار ہے۔ مہنگائی کے حوالے سے بات کرتے ہوئے انہوں نے کہا کہ چینی 300 اور گندم کی کرپشن 400 ارب سے اوپر چلی گئی ہے یہاں عوام کی جیب سے پیسہ جا رہا ہے لیکن کوئی پوچھنے والا نہیں ہے۔
سابق وزیر اعظم نے کہا کہ وفاقی وزرا سارا دن بے عزتی کرنے میں مصروف رہتے ہیں وہ ذرا یہ بتائیں کہ ان کی وزارتوں نے کون سا کام کیا ہے۔ جو منصوبے چل رہے تھے وہ بھی مکمل نہیں ہو سکے۔ انہوں نے کہا کہ جس آدمی کا کردار ہی نہ ہو اس کے الزام پر کمنٹ نہیں کرتا۔
لاہور میں ایاز صادق کے خلاف پوسٹرز لگے لیکن لگانے والے کا پتا نہیں۔ شاہد خاقان عباسی نے کہا کہ اس وقت ملک میں عجیب سے معاملات ہیں۔ ہائبرڈ ماڈل نے ملک میں جو تباہی کی اس کا ذمہ دارکون ہے؟۔
