اسلام آباد (رپورٹنگ آن لائن)وفاقی وزیر اطلاعات و نشریات عطاء اللہ تارڑ نے لاہور پریس کلب کے نومنتخب عہدیداران کو مبارکباد دیتے ہوئے کہا ہے کہ پریس کلب صحافیوں کی مضبوط آواز ہے اور صحافی برادری کی فلاح و بہبود کے لیے ہر ممکن تعاون کیا جائے گا۔
پیر کو اپنے تہنیتی بیان میں وفاقی وزیر اطلاعات نے ارشد انصاری کو لاہور پریس کلب کا صدر، سلمان قریشی کو سینئر نائب صدر، افضال طالب کو جنرل سیکرٹری، ناصرہ عتیق اور مدیحہ الماس کو نائب صدور، سالک نواز کو خازن اور عمران شیخ کو جوائنٹ سیکرٹری منتخب ہونے پر مبارکباد دی۔ وفاقی وزیر اطلاعات نے کہا کہ پریس کلب صحافیوں کی مضبوط آواز ہے، جو پیشہ ورانہ اقدار کے فروغ اور صحافیوں کی یکجہتی کے لیے اہم کردار ادا کرتا ہے۔
انہوں نے امید ظاہر کی کہ لاہور پریس کلب کی نومنتخب باڈی صحافیوں کے مسائل کے حل، پریس کلب کی فلاح و بہبود اور آزادی صحافت کے فروغ کے لیے بھرپور کردار ادا کرے گی۔ وفاقی وزیر اطلاعات نے نومنتخب قیادت کے لیے نیک تمناؤں کا بھی اظہار کیا۔
