اسلام آباد (رپورٹنگ آن لائن)وفاقی وزیر امور کشمیر و گلگت بلتستان، سیفران انجینئر امیر مقام نے کہا ہے کہ وزیراعلیٰ خیبرپختونخوا کا حالیہ بیان افسوسناک اور اشتعال انگیز ہے۔
ہفتہ کو وزیراعلیٰ خیبرپختونخوا کے حالیہ بیان پر اپنے ردعمل میں انہوں نے کہا کہ وزیراعلیٰ خیبرپختونخوا کا حالیہ بیان افسوسناک اور اشتعال انگیز ہے۔انجینئر امیر مقام نے کہا کہ ریاستی اداروں کے خلاف نفرت انگیز بیانات کسی صورت برداشت نہیں کیے جا سکتے،خیبرپختونخوا کے عوام سکیورٹی فورسز اور پاک افواج کی قربانیوں کو سلام پیش کرتے ہیں۔انجینئر امیر مقام نے کہا کہ خیبرپختونخوا کے عوام شہدا کی لازوال قربانیوں اور ان کے خون کا احترام کرتے ہیں،وزیراعلیٰ کا بیان فرد واحد کی سوچ کی عکاسی کرتا ہے، عوام کا نہیں۔
انہوں نے کہا کہ ایسی باتیں دشمن کے بیانیے کو تقویت دیتی ہیں۔انجینئر امیر مقام نے کہا کہ عوام میں انتشار اور اداروں کے خلاف بداعتمادی پھیلانا محب وطن قیادت کا شیوہ نہیں،مساجد اور شہدا کے تقدس کے نام پر نفرت پھیلانا انتہائی قابلِ مذمت ہے۔انجینئر امیر مقام نے کہا کہ وزیراعلیٰ کا منصب انتشار اور اداروں سے ٹکراؤ کی بجائیسنجیدگی، ذمہ داری اور قومی یکجہتی کا متقاضی ہے،مسلم لیگ (ن) کا واضح موقف ہے کہ امن، ترقی اور استحکام ہی عوام کا اصل حق ہے۔
