کراچی(رپورٹنگ آن لائن)پیپلزپارٹی کے سینئر رہنما منظور حسین وسان نے سیاستدانوں، پی ٹی آئی اور دیگر سے متعلق بڑی پیش گوئیاں کرتے ہوئے کہاہے کہ ملک میں دو یا اڑھائی ماہ کے دوران کچھ بھی ہوسکتا ہے۔اچھے دن نظر نہیں آرہے، مستقبل قریب میں عدلیہ،اداروں اورسیاستدانوں کے درمیان محاذ آرائی بڑھ سکتی ہے۔
بدھ کو جاری بیان میں منظوروسان نے کہاکہ سیاستدانوں کے لئے آنے والے دن اچھے نظر نہیں آرہے۔انہوں نے سیاستدانوں کو مشورہ دیاکہ سیاستدان لڑائی کی بجائے جمہوریت کی بقا کا سوچیںاورخوش فہمی میں نہ رہیں انکے لئے حالات اچھے نہیں۔انہوں نے کہاکہ ممکن ہے کہ قومی اسمبلی تحلیل ہوجائے اور نگراں حکومت بھی آسکتی ہے۔مجھے محسوس ہورہا ہے کہ کہیں دوبارہ نہ ملک میں بڑی صفائی ہوجائے۔
منظوروسان نے کہاکہ تحریک انصاف اور بانی پی ٹی آئی بند گلی میں پھنس چکے ہیں۔انہوں نے کہاکہ پی ٹی آئی والے عقلمندی سے بند گلی سے نکل سکتے ہیں،انکو اس حد نہیں جانا چاہیے جو واپسی کا راستہ بھی نہ ہو۔عمران خان کو سمجھداری سے کام لینا چاہئیے۔رہنماپیپلزپارٹی نے کہاکہ عمران خان کو نیچے آنا ہی پڑیگا اورسوچ سمجھ کر فیصلے کریں۔سیاستدان ہیں تو یہ ملک ہے اگر سیاستدان نہیں تو یہ ملک بھی پھرنہیں چل سکے گا۔
ہوسکتا ہے کہ آگے چل کرکے ایسا بھی وقت آئے گا کہ کوئی اس ملک کا وزیراعظم بننے کو تیار نہیں ہوگا۔انہوں نے کہاکہ صدر آصف علی زرداری ملک کے لئے اچھا کام کررہے ہیں۔
