رپورٹنگ آن لائن ۔
نوجوانوں کی فلاح و بہبود اور اُن کی سیلف ڈویلپمنٹ کیلئے کام کرنے والی پاکستان کی معروف این جی او ملین سمائلز فاونڈیشن اور ملکر کے مابین حال ہی میں ایک مفاہمتی یاداشت پر دستخط کئے گئے ہیں جس کے مطابق ملین سمائلز فاونڈیشن کے رضاکاروں کو ایک ایسا پلیٹ فارم مہیا کیا جائے گا جس کے موثر استعمال سے رضاکارانہ کاموں کے ساتھ انسانیت کیلئے مسکراہٹیں بانٹنے کے عمل میں آسانی پیدا ہوگی۔ مفاہمتی یاداشت پر ملین سمائلز فاونڈیشن کی چیئرپرسن ام محمد ملکر کے بانی عمر سیف نے دستخط کئے ۔ اس موقع پر ملین سمائلز فاونڈیشن کے بانی اور سی ای او ذیشان افضل، کنٹری ڈائریکٹر آصف شہزاد سمیت دیگر عہدیداران بھی موقع پر موجود تھے۔
اس موقع پر چیئرپرسن ملین سمائلز فاونڈیشن ام محمد کا کہنا تھا کہ الحمداللہ ملین سمائلز فاونڈیشن نے اپنے قیام سے آج تک کے مختصر عرصے میں اپنی علیحدہ شناخت قائم کی ہے ۔ اُن کا کہنا تھا کہ ہمیں اس بات کی خوشی ہے کہ ملین سمائلز کے متاثر کن ویژن کی وجہ سے پاکستان کے نامور ادارے ہمارے ساتھ مل کر کام کرنے میں فخر محسوس کر رہے ہیں۔اُنہوں نے کہا کہ ملکر کے ساتھ اس شراکت داری کا مقصد ہنر مند اور با صلاحیت لوگوں کو رضاکارانہ کاموں کےساتھ منسلک کرتے ہوئے معاشرے میں بہتری لانے کی کوشش کرنا ہے ، اور ہمیں امید ہے کہ پاکستان کیلئے اُٹھائے گئے اس نیک مقصد میں ہم کامیاب ہو جائیں گے ۔اُنہوں نے کہا کہ ملین سمائلز فاونڈیشن اور ملکر کی اس شراکت داری سے رضاکاروں اور سماجی فلاح کے لئے ہونے والے کاموں میں موجودفاصلے مزید سمٹ جائیں گے۔
