اسلام آباد (رپورٹنگ آن لائن)قائمقام صدر یوسف رضا گیلانی نے آبادی میں خطرناک حد تک اضافے کے موثر انتظام کیلئے مربوط کوششوں پر زور دیتے ہوئے آبادی پر قومی ایکشن پلان کا کامیابی سے نفاذ ناگزیر ہے.
بڑھتی آبادی کنٹرول کرنے کیلئے مربوط کوششوں کی ضرورت ہے ۔ ایوان صدر سے جاری اعلامیہ کے مطابق قائمقام صدر مملکت یوسف رضا گیلانی کی زیرِ صدارت آبادی کے انتظام سے متعلق اجلاس ہو۔اجلاس سپریم کورٹ کے 2018 کے سوموٹو ایکشن ، مشترکہ مفادات کونسل کی سفارشات کے پس منظر میں ہوا۔
اجلاس میں سیکرٹری وزارت صحت ، ڈائریکٹر جنرل پاپولیشن ونگ اور وزارت ِصحت کے اعلیٰ حکام نے شرکت کی ۔ یوسف رضا گیلانی نے کہاکہ آبادی پر قومی ایکشن پلان کا کامیابی سے نفاذ ناگزیر ہے ، بڑھتی آبادی کنٹرول کرنے کیلئے مربوط کوششوں کی ضرورت ہے۔ قائمقام صدر یوسف رضا گیلانی نے کہاکہ آبادی پر آزاد جموں و کشمیر اور گلگت بلتستان سمیت صوبائی حکومتوں کی مشاورت ضروری ہے ۔
قائمقام صدر مملکت نے کہاکہ بڑھتی آبادی کے چیلنج کیلئے اجتماعی کوششوں بالخصوص صوبوں کے تعاون کی ضرورت ہے ۔یوسف رضا گیلانی نے آبادی میں اضافے کی شرح کم کرنے ، آبادی کے دیگر متعلقہ اشاریوں کو بہتر بنانے کی ضرورت پر زور دیا ۔ یوسف رضا گیلانی نے کہاکہ آبادی کے چیلنج بارے آگاہی پیدا کرنے کیلئے صوبائی حکومتوں اور نجی شعبے سمیت تمام اسٹیک ہولڈرز کو شامل کرنے کی ضرورت ہے۔
یوسف رضا گیلانی نے خاندانی منصوبہ بندی کی خدمات تک لوگوں کی رسائی بڑھانے کی ضرورت پر بھی زور دیا ۔اجلاس میں صدر یوسف رضا گیلانی کو آبادی کے حوالے سے نیشنل ایکشن پلان پر بریفنگ دی گئی۔
بتایاگیاکہ 2019 سے 2024 تک آبادی کے حوالے سے نیشنل ایکشن پلان پر عملدرآمد کیا گیا ، 2025 سے 2030 تک آبادی کے حوالے سے نظرثانی شدہ نیشنل ایکشن پلان صوبوں کی مشاورت سے تیار کیا گیا ہے ، نیا منصوبہ منظوری کا منتظر ، آبادی سے متعلق وفاقی ٹاسک فورس کے آئندہ اجلاس میں غور کیا جائیگا۔
