مکو آ نہ (رپورٹنگ آن لائن)سینٹرل چیئر مین آل پاکستان کاٹن پاور لومز ایسوسی ایشن چوہدری خالد محمود چیمہ،سینئر وائس چیئر مین شیخ خالد عزیز مخی،وائس چیئر مین شیخ عامر نثار،سابق چیئر مین چوہدری محمد نواز،سر پرست اعلیٰ جاوید صادق کاہلوں نے کہا ہے کہ فیصل آباد میں مہنگی بجلی کے بعد سوتی دھاگے کی قیمتیں تاریخ کی بلند ترین سطح پرپہنچ گئی ہیں۔
سوتی دھاگے کی قیمتیں بڑھنے کے باعث پاور لومز سیکٹر پھر بحران کا شکار ہونے لگا اور پیداواری لاگت میں اضافے سے فیکٹری مالکان کی مشکلات بڑھ گئیں۔ان خیالات کا اظہار انہوںنے ایک اجلاس سے خطاب کرتے ہوئے کیا۔سابق چیئر مین خرم اخلاق منج، چوہدری احسان الحق، رانا عامر رضا،عمر فاروق کاہلوں، چوہدری مشتا ق احمد اور دیگر بھی اس موقع پر موجود تھے۔چوہدری جاوید صادق کاہلوں نے کہا کہ پاکستان میں ملکی کپاس کی پیداوار تاریخ کی کم ترین سطح پر ہے اور درآمدی کپاس کی قیمتیں تاریخ کی بلند ترین سطح پر پہنچ گئی ہیں جس کے نتیجے میں سوتی دھاگہ انتہائی مہنگا ہونے سے کپڑا بنانے والے فیکٹری مالکان پیداواری لاگت دوگنی ہونے سے پریشان ہیں۔
فیکٹری مالکان کے مطابق یارن کی قیمتوں میں بے تحاشا اضافہ ہو چکا ہے، جس کی وجہ سے نہ صرف ٹیکسٹائل ایکسپورٹ 11فیصد کم ہو گئی ہے بلکہ پاور لومز انڈسٹری جو بڑی مشکل سے بحران سے نکلی تھی وہ ایک بار پھر بدترین بحران کا شکار ہو گئی ہے۔انہوں نے کہا کہ فیکٹری مالکان کے مطابق مہنگی ترین بجلی بھی پاور لومز سیکٹر کے بحران میں اضافے کا سبب ہے، بجلی ہر ماہ مہنگی ہو رہی ہے، اس کے بعد دھاگے پر سٹہ کھیلا جا رہا ہے جس سے ہماری انڈسٹری تباہ ہو رہی ہے۔پاور لومز مالکان کا حکومت سے مطالبہ ہے کہ انڈسٹری کو بحران سے بچانے کے لیے بجلی اور دھاگے کی قیمتوں میں کمی لانے کے لیے فوری اقدامات اٹھائے جائیں۔
