اسلام آباد (ر پورٹنگ آن لائن)معروف پاکستانی گلوکار اور سماجی کارکن شہزاد رائے نے کامیڈی کنگ عْمر شریف کے انتقال پر افسوس کا اظہار کرتے ہوئے کہا ہے کہ عمر شریف کا دنیا کو دیکھنے کا نظریہ بہت منفرد تھا۔شہزاد رائے نے مائیکرو بلاگنگ ویب سائٹ ٹوئٹر پر لیجنڈ اداکار عمر شریف کے انتقال پر افسوس کا اظہار کرتے ہوئے ان کے بارے میں لکھا کہ اگر آپ ان کی صحبت میں ہوتے تو وہ کبھی آپ کو اداس یا مایوس نہیں ہونے دیتے۔ انہوں نے لکھا کہ وہ جس طرح سے دنیا کو دیکھتے تھے وہ نظریہ ہم میں سے بیشتر سے مختلف تھا اور اس بات کا اندازہ ان کی پرفارمنس سے کیا جا سکتا تھا۔گلوکار نے لکھا کہ سر عمر شریف! آپ کو ہمیشہ یاد رکھا جائے گا۔واضح رہے کہ لیجنڈ کامیڈین عمر شریف طویل علالت کے بعد جرمنی کے ہسپتال میں انتقال کر گئے۔اداکار عمر شریف 4 روز سے جرمنی کے ہسپتال میں داخل تھے ، انہیں کراچی سے واشنگٹن علاج کیلئے پہنچایا جارہا تھا لیکن ناساز طبیعت کے باعث انہیں جرمنی کے اسپتال میں ہی داخل کردیا گیا تھا۔
لیجنڈری اداکار و کامیڈین عمر شریف کافی عرصے سے عارضہ قلب ، گردے اور دیگر مختلف بیماریوں میں مبتلا تھے۔خیال رہے کہ عمر شریف نے اپنے کیریئر کا آغاز 1974میں 14سال کی عمر میں اسٹیج اداکاری سے کیا تھا اور 1980 میں پہلی مرتبہ آڈیو کیسٹ پر اپنے ڈرامے ریلیز کیے تھے۔عمر شریف ٹی وی، اسٹیج اداکار، فلم ڈائریکٹر کے طور پر جانے جاتے ہیں، انہوں نے اسٹیج و تھیٹر ناصرف ملک میں بلکہ سرحد پار بھی بہت مقبولیت حاصل کی۔انہوں نے تقریباً 5 دہائیوں تک شوبز میں کام کیا ہے اور درجنوں، ڈراموں، اسٹیج تھیٹرز اور لائیو پروگرامز میں پرفارم کیا۔
