اسلام آباد(رپورٹنگ آن لائن)وفاقی وزیر برائے امورِ کشمیر، گلگت بلتستان اور سیفران انجینئر امیر مقام نے کہا ہے کہ عالمی برادری سے مطالبہ کرتے ہیں کہ وہ بھارتی غیر قانونی زیرِ قبضہ جموں و کشمیر میں انسانی حقوق کی خلاف ورزیوں کو روکنے، بھارت کو اس کے غیر قانونی اقدامات واپس لینے اور اقوامِ متحدہ کی سلامتی کونسل کی قراردادوں پر عملدرآمد یقینی بنانے کے لیےفیصلہ کن اقدامات کریں،پاکستان ہر فورم پر کشمیریوں کی آواز بلند کرتا رہے گا اور ان کی اخلاقی، سیاسی اور سفارتی سطح پرحمایت جاری رکھے گا۔
بدھ 5 فروری کویومِ یکجہتی کشمیر کے موقع پر اپنے پیغام میں وفاقی وزیر نے کہا کہ ہر سال پانچ فروری کو پاکستان کے عوام اپنے کشمیری بھائیوں اور بہنوں کے ساتھ بھرپور یکجہتی کے اظہار کے لیے متحد ہو جاتے ہیں، ہم ان کی حقِ خودارادیت کے حصول کی جائز جدوجہد کے لیے اپنی غیر متزلزل حمایت کی تجدید کرتے ہیں جیسا کہ متعلقہ اقوامِ متحدہ کی سلامتی کونسل کی قراردادوں میں درج ہے۔
انہوں نے کہا کہ جموں و کشمیر کا تنازع دنیا کے قدیم ترین تنازعات میں سے ایک ہے اور 1948 سے اقوامِ متحدہ کی سلامتی کونسل کے ایجنڈے پر موجود ہے،یہ تنازع بھارت کی ہٹ دھرمی کے باعث تاحال حل طلب ہے، بھارت اقوامِ متحدہ کی سلامتی کونسل کی قراردادوں پر عمل درآمد اور کشمیری عوام کو ان کا وعدہ کردہ حقِ خودارادیت دینے سےمسلسل انکار کر رہا ہے۔بھارت کے غیر قانونی زیرِ قبضہ جموں و کشمیر میں زندگی نہایت دشوار ہے اور کشمیری عوام کو ظالمانہ بھارتی نظام کے تحت شدیدمشکلات کا سامنا ہے۔
وفاقی وزیر نے کہا کہ کشمیری عوام کے حقیقی نمائندے آج بھی جیلوں میں قید ہیں اور ہزاروں کشمیری سیاسی کارکنوں کو بلاجوازحراست میں رکھا گیا ہے،اظہارِ رائے کی آزادی بھی سختی سے محدود ہےجبکہ مقامی میڈیا کو سرکاری بیانیے کی پیروی پر مجبور کیا گیا ہے،بالخصوص 5 اگست 2019 کو بھارت نے غیر قانونی اور یکطرفہ اقدامات کے ذریعے اپنی ناجائزقبضے کو مضبوط کرنے کی کوشش کی جن کا مقصد خطے کے آبادیاتی ڈھانچے کو تبدیل کرنا اور کشمیری عوام کو بے اختیار بنانا تھاتاہم بھارتی قابض افواج کی جانب سے کسی بھی درجے کے جبر و تشدد سے کشمیری عوام کے ناقابلِ تسخیر عزم کو توڑا نہیں جا سکا اور نہ ہی ان کی حقِ خودارادیت کے حصول کی جدوجہد کمزور ہوئی ہے،پاکستان ان کے حوصلے کو سلام پیش کرتا ہے اور تحریکِ کشمیر کے لیے دی جانے والی ان کی بے شمار قربانیوں کو خراجِ تحسین پیش کرتا ہے۔
اس موقع پر ہم عالمی برادری، بالخصوص اقوامِ متحدہ کو یاد دلاتے ہیں کہ کشمیری عوام آج بھی اس آزاد اور غیر جانبدار رائے شماری کے منتظر ہیں جس کا وعدہ انہیں اقوامِ متحدہ کی سلامتی کونسل کی قراردادوں کے تحت کیا گیا تھا۔ ہم عالمی برادری سے مطالبہ کرتے ہیں کہ وہ بھارتی غیر قانونی زیرِ قبضہ جموں و کشمیر میں انسانی حقوق کی خلاف ورزیوں کو روکنے، بھارت کو اس کے غیر قانونی اقدامات واپس لینے پر مجبور کرنے اور اقوامِ متحدہ کی سلامتی کونسل کی قراردادوں پر عمل درآمد یقینی بنانے کے لیےفیصلہ کن اقدامات کرے۔ہم اپنے کشمیری بھائیوں اور بہنوں کو یقین دہانی کراتے ہیں کہ پاکستان ہمیشہ آپ کے شانہ بشانہ کھڑا رہے گا،پاکستان ہر فورم پر آپ کی آواز بلند کرتا رہے گا او ر اخلاقی، سیاسی اور سفارتی سطح پر آپ کی حمایت جاری رکھے گا، اسوقت تک کہ انصاف فراہم کیا جائے اور آپ کو آپ کا وعدہ کردہ حقِ خودارادیت حاصل ہو جائے۔
