دوحہ/اسلام آباد(رپورٹنگ آن لائن)صدر مملکت آصف علی زرداری سے منگل کو قطر کے دارالحکومت دوحہ میں سماجی ترقی کے لیے دوسرے عالمی سربراہی اجلاس کے موقع پر جمہوریہ عراق کے صدر ڈاکٹر عبداللطیف جمال رشید نے ملاقات کی۔
ایوان صدر کے پریس ونگ سے جاری بیان کے مطابق دونوں رہنمائوں نے پاکستان اور عراق کے مابین تعلقات کے تمام پہلوئوں کا جائزہ لیا اور دونوں ممالک کے درمیان دیرینہ برادرانہ تعلقات کو مزید مستحکم کرنے کے لیے اپنے باہمی عزم کا اعادہ کیا۔ تجارت اور سرمایہ کاری پر تبادلہ خیال کرتے ہوئے فریقین نے کاروباری رابطوں میں اضافہ اور ویزا سہولت کے ذریعے اقتصادی روابط کو بڑھانے کی اہمیت پر زور دیا۔
صدر آصف علی زرداری نے پاکستانی زائرین کو سہولت فراہم کرنے میں عراق کے تعاون کو سراہا اور عراق میں پاکستانی کمیونٹی کے گرانقدر تعاون کا ذکر کیا جو دونوں ممالک کے درمیان خیر سگالی کے پل کے طور پر کام کرتی ہے۔ عراقی صدر نے صدر مملکت کو عراق کے دورے کی دعوت دی۔
صدر آصف علی زرداری نے دعوت قبول کرتے ہوئے کہا کہ وہ ماہ رواں کے آخر میں عراقی پارلیمانی انتخابات کے فوراً بعد عراق کا دورہ کریں گے۔ دونوں رہنمائوں نے علاقائی امن، استحکام اور تعاون پر بھی تبادلہ خیال کیا اور دوطرفہ تعلقات کو آگے بڑھانے کے لیے باقاعدہ اعلیٰ سطح کے رابطوں کو برقرار رکھنے پر اتفاق کیا۔ ملاقات میں خاتون اول بی بی آصفہ بھٹو زرداری، چیئرمین پیپلز پارٹی بلاول بھٹو زرداری اور قطر میں پاکستان کے سفیر بھی موجود تھے۔
