ممبئی(رپورٹنگ آن لائن)بالی ووڈ سپر سٹار سلمان خان کے مداحوں کو اس مرتبہ اداکار کی سالگرہ پر انکی فلم سکندر کا ٹیزر بطور سرپرائز ملے گا۔
ریلیز کے مراحل میں موجود سلمان خان کی فلم سکندر کی ایک جھلک دیکھنے کے لیے ان کے لاکھوں مداح کافی وقت سے بے قرار ہیں، متعدد جان لیوا دھمکیوں کے باوجود سلمان خان نے فلم کی شوٹنگ جاری رکھی ہوئی ہے۔
اس فلم کے پروڈیوسر ساجد ناڈیا والا نے انکشاف کیا کہ فلم سکندر کا ٹیزر اداکار کی 59ویں سالگرہ کے دن جاری کیا جائے گا، سلمان خان 27دسمبر کو اپنی 59ویں سالگرہ منائیں گے اور اب اسی دن ان کی فلم کا ٹیزر بھی مداحوں کے لیے سامنے آئے گا۔بھارتی میڈیا کے مطابق یہی نہیں سلمان خان کے سالگرہ کی تقریب کے دوران فلم کا پوسٹر بھی جاری کیا جائے گا۔
ایکشن اور تھرل سے بھرپور اس فلم میں سلمان خان کے مقابل رشمیکا مندانا ہیں اور یہ فلم اگلے سال عید کے موقع پر ریلیز کی جائے گی، فلم سکندر کی شوٹنگ مکمل کرنے کے بعد سلمان خان کچھ ہی وقفے کے بعد دوبارہ ایک اور فلم کی شوٹنگ شروع کر دیں گے۔
