اسلام آباد (رپورٹنگ آن لائن)سپیکر قومی اسمبلی سردار ایاز صادق نے ضلع کرم میں فتنہ الہندوستان کے خوارجی دہشتگردوں کے خلاف کامیاب آپریشن پر سکیورٹی فورسز کو خراجِ تحسین پیش کرتے ہوئے کہاہے کہ ،دہشتگردی کے خلاف سکیورٹی فورسز کی بہادرانہ کارروائیاں ملک کے استحکام کی ضمانت ہیں.
جمعرات کو اپنے بیان میں انہوں نے کامیاب آپریشن کے ذریعے 23 خوارجی دہشتگردوں کو جہنم واصل کرنے پر سکیورٹی فورسز کی جرات اور بہادری کو سلام پیش کیا اور سکیورٹی فورسز کی پیشہ ورانہ مہارت اور شجاعت کی تعریف کی۔ انہوں نے کہا کہ خیبر پختونخوا میں خوارجی دہشتگردوں کے خلاف سکیورٹی فورسز کے کامیاب آپریشنز قابلِ ستائش ہیں،بھارتی سرپرستی میں سرگرم خوارج کے خاتمے کے لیے فورسز کی دلیرانہ کارروائیوں پر فخر ہے،دہشتگردی کے خلاف سکیورٹی فورسز کی بہادرانہ کارروائیاں ملک کے استحکام کی ضمانت ہیں،خوارجی دہشتگردوں کے نیٹ ورک کے خاتمے میں مصروف افواجِ پاکستان کے بہادر جوانوں کو سلام پیش کرتا ہوں۔
انہوں نے کہا کہ بھارتی حمایت یافتہ دہشتگردوں کی سرکوبی قومی سلامتی کے عزم کی مظہر ہے،عزمِ استحکام کے تحت جاری آپریشنز قوم کے اعتماد اور یکجہتی کو مزید مضبوط بنا رہے ہیں،دہشتگردی کے مکمل خاتمے کے لیے پوری قوم سکیورٹی فورسز کے شانہ بشانہ کھڑی ہے،دہشتگردی کا مقابلہ کرنے والے بہادر جوانوں کو قوم سلام پیش کرتی ہے،ملکی امن کے لیے ہر محاذ پر ڈٹے جوان ہمارا فخر ہیں، دہشتگردی کے ناسور کو جڑ سے اکھاڑنے کے لیے فورسز کے اقدامات قابلِ تحسین ہیں،متحد قوم دہشتگردی کے خلاف دشمن کے ناپاک عزائم کو ناکام بنائے گی۔
