کراچی(رپورٹنگ آن لائن)سوشل میڈیا پر دولت کی نمود و نمائش کرنے والے امیر افراد ایف بی آر کے ریڈار پر آگئے۔ایف بی آرسوشل میڈیا ٹیم نے شاہانہ لائف اسٹائل رکھنے والے ایک لاکھ امیر افراد کا ڈیٹا جمع کر لیاہے،حکام نے واضح کردیا کہ بڑے بڑے بنگلوں،چمچماتی گاڑیوں،زیورات کی نمائش کرنے والوں کو نہیں چھوڑیں گے شادیوں پر شاہانہ اخراجات کرنے والے بھی زد میں آئیں گے۔
ذرائع ایف بی آرکے مطابق شادیوں پر بیس بیس ہزارڈالرمالیت کے سوٹ استعمال کیئے جارہے ہیں،انکم ٹیکس گوشواروں میں شاہانہ لائف اسٹائل ظاہرنہ کرنے والے پکڑمیں آئیں گے،ایف بی آرگزشتہ سال جمع کرائے گئے گوشواروں کا اس سال سے موازنہ کرے گا۔ایف بی آر کے مطابق مجموعی گوشواروں میں سے 80 فیصدکا آڈٹ کیا جائے گا،دولت کی نمائش کرنے والوں کوٹیکس ریٹرن کے ذریعے ذرائع آمدن بتانا پڑیں گے.
گوشواروں میں سالانہ آمدن کا اضافہ ظاہرنہ کرنے والوں کیخلاف کارروائی ہوگی۔حکام ایف بی آرکے مطابق ایسے لوگ قانونی کارروائی سے بچنے کیلئے اپنے ٹیکس ریٹرن اپ ڈیٹ کر لیں، انکم ٹیکس گوشواروں میں اپ ڈیٹڈ معلومات دینے والوں کو فی الحال کچھ نہیں کہا جائے گا۔
