کراچی(رپورٹنگ آن لائن) سندھ ہائی کورٹ کے آئینی بینچ نے رکنِ صوبائی اسمبلی جہانگیر موسیٰ پر سیاسی مخالف کو قومی سائبر جرائم تحقیقاتی ادارے کے ذریعے ہراساں کرنے کے الزام سے متعلق درخواست پر سماعت کرتے ہوئے درخواست گزار کے خلاف آئندہ سماعت تک کارروائی نہ کرنے کا حکم دے دیا۔سماعت کے دوران درخواست گزار کے وکیل بیرسٹر جہانگیر کلہوڑو نے مؤقف اختیار کیا کہ ایم پی اے جہانگیر موسیٰ کے بھائی سائبر جرائم کے ادارے میں سب انسپکٹر تعینات ہیں۔ ان کے مطابق سیاسی مخالفت کی بنیاد پر درخواست گزار کو تین مرتبہ معطل کروایا جاچکا ہے۔
وکیلِ درخواست گزار نے مزید مؤقف اختیار کیا کہ جب درخواست گزار نے سماجی ذرائع ابلاغ پر اپنی بے گناہی سے متعلق حقائق بیان کیے تو متعلقہ ادارے کی جانب سے اس کے خلاف مقدمہ درج کرلیا گیا۔عدالت نے درخواست گزار کے خلاف آئندہ سماعت تک کارروائی نہ کرنے کا حکم دیتے ہوئے وفاقی وزارتِ داخلہ، وفاقی تحقیقاتی ادارے اور دیگر فریقین سے 11 نومبر کو جواب طلب کرلیا۔درخواست میں عائد کیے گئے الزامات اور فریقین کے مؤقف پر حتمی عدالتی فیصلہ آنا ابھی باقی ہے۔
