لاہور(رپورٹنگ آن لائن)وزیر اطلاعات و ثقافت پنجاب عظمیٰ بخاری نے کہا ہے کہ وزیر اعلیٰ مریم نواز نے سعودی پاک جوائنٹ بزنس کونسل کے وفد کو پنجاب میں مختلف شعبوں میں اربوں ڈالر کی سرمایہ کاری کی پیشکش کی ہے ،آئندہ دس روز میں پیشرفت بارے باضابطہ اعلان کیا جائے گا،پی ٹی آئی والوں کی جانب سے کہا جارہا کہ ڈی جی آئی ایس پی آر کی ساری پریس کانفرنس عمران خان کے خلاف تھی ، آپ کو تو شرم سے ڈوب مرنا چاہیے کہ دہشتگردوں کی بات ہو رہی ہے اور ان کے ساتھ عمران خان کا نام آرہا ہے .
آپ ان بیانات سے خود عمران خان اوردہشتگردوں کاگٹھ جوڑ بنا رہے ہیں تو اس پر ہم کیا کہہ سکتے ہیں ۔پنجاب حکومت کے آفیشل یوٹیوب چینل پر وی لاگ میں گفتگو کرتے ہوئے صوبائی وزیر اطلاعات عظمی بخاری نے کہا کہ کچھ یو ٹیومر جو ملک سے بھاگ گئے ہیں اب وہ باہر سے بیٹھ کر ہمیں بتائیں گے کہ ملک کیسے چلانا ہے ،ڈی جی آئی ایس پی آر نے جو تلخ حقائق قوم کے سامنے رکھے اس سے بہت سے لوگوں کی دُم پر پاؤں آ گیا اور یہ ہر طرف بھاگے پھر رہے ہیں ،جہاں حالات خراب ہوں وہاں فوج کو مداخلت کرنا پڑتی ہے ۔
انہوں نے کہا کہ کوئی فرد واحد پاکستان سے اوپر نہیں ہو سکتا ، ان کے دماغ کی حالت دیکھیں کہ یہاں خیبر پختوانخواہ میں دہشتگردی کے خلاف جنگ کو فلسطین کے امن منصوبے سے جوڑ رہے ہیں ، طالبان ہمارے ملک پر قبضہ کرنا چاہتے ہیں اور یہ کہتے ہیں ان سے بات چیت کریں یہ امن کا منصوبہ ہے ، جو دہشتگردوں کو سپورٹ کرے ،ملک کے اندر دہشتگردی کی اجازت دے ایسی صوبائی حکومت نہیں بن سکتی ،یہ کہہ رہے ہیں ظالموں کے ساتھ بیٹھیں ۔
عظمی بخاری نے کہا کہ سعودی پاک جوائنٹ بزنس کونسل کے دورے کے حوالے سے تفصیلات بتاتے ہوئے کہا کہ وزیر اعلیٰ پنجاب مریم نواز نے وفد کو باضابطہ طو رپرپنجاب کی طرف سے مختلف شعبوں میں اربوں ڈالر کی سرمایہ کی پیشکش کی، وفد نے مائنز اینڈ منرلز میں خصوصی دلچسپی لی ۔وزیر اطلاعات عظمی بخاری نے مزید کہا کہ لاہور ڈویلپمنٹ پروگرام 130ارب روپے سے زائد کا تاریخی ڈویلپمنٹ پروگرام ہے ، فیز ون میں351کلو میٹر سیوریج لائن میں سے 349کلو میٹر ڈال دی گئی ، گلیاں 97فیصد مکمل کر لی گئیں ، فیز ون 94فیصد مکمل ہو گیا ، فیز ٹو اگلے سال اپریل تک مکمل کیا جائے گا ۔
