لاہور (رپورٹنگ آن لائن) لاہور ہائیکورٹ نے سموگ تدارک سے متعلق کیس کی گزشتہ سماعت کا تحریری حکم جاری کردیا۔جسٹس شاہد کریم نے گزشتہ سماعت کا دو صفحات پر مشتمل تحریری حکم جاری کیا۔
تحریری فیصلے میں کہاگیاہے کہ دھواں دینے والی گاڑیوں کے خلاف بلا تفریق کارروائیاں جاری رکھی جائیں ،آلودگی کا باعث بننے والی پولیس اور تعلیمی اداروں سمیت سرکاری بسوں کے خلاف بھی کارروائی کی جائے۔تحریری حکم میں کہاگیاہے کہ ہاوسنگ سوسائٹیز میں جاری تعمیرات میں ایس او پیز پر عمل درآمد کو یقینی بنایا جائے ،پی ایچ اے پارکس کی بحالی اور درختوں کے متعلق رپورٹس آئندہ سماعت پر پیش کی جائے ۔
تحریری حکم میں مزید کہاگیاہے کہ ایل ڈی اے نے ناصر باغ کے حوالے سے رپورٹ پیش کی،ایل ڈی اے نے ناصر باغ کے منصوبے سے متعلق تین رکنی کمیٹی قائم کرنے کی رپورٹ دی ،رپورٹ کے مطابق کمیٹی ناصر باغ پروجیکٹ میں اراکین کے ساتھ رابطے اور ناصر باغ پروجیکٹ پراپنی رائے دیگی،کمیٹی آئندہ سماعت پر ناصر باغ کے تحفظ کے لیے کئے گئے اقدامات کی رپورٹ پیش کرے۔
