کراچی(رپورٹنگ آن لائن)پاکستان پیپلز پارٹی کے چیئرمین بلاول بھٹو زرداری نے صحافیوں کے خلاف جرائم کی روک تھام کے عالمی دن پر اپنے پیغام میں سچائی اور جمہوریت کی خاطر اپنی جانوں کو خطرے میں ڈالنے والے صحافیوں کو خراج تحسین پیش کیا ہے۔
انہوں نے کہا کہ صحافیوں کو تشدد، دھمکیوں، یا انصاف سے محروم کر کے خاموش کرنا صرف افراد پر نہیں، جمہوریت پر حملہ ہے۔ انہوں نے کہا کہ بھارت کے زیر تسلط مقبوضہ کشمیر اور غزہ میں اسرائیلی قابض افواج کے ہاتھوں صحافیوں پر مظالم مذمت کرتے ہیں۔ مقبوضہ کشمیر میں بھارتی اور غزہ میں اسرائیلی قابض افواج کے مظالم انسانی تاریخ کے شرمناک ابواب ہیں۔انہوں نے کہا کہ قائدِ عوام اور شہید محترمہ بینظیر بھٹو کے جمہوری وژن کی روشنی میں پیپلز پارٹی آزادی صحافت میں یقین رکھتی ہے۔
تاریخ کے بدترین میڈیا ٹرائل کا سامنا کرنے کے باوجود پیپلز پارٹی نے ہمیشہ آزادی صحافت کا علم بلند رکھا ہے۔بلاول بھٹو زرداری نے کہا کہ آئیے اس عہد کی تجدید کریں کہ ہم ان بہادر صحافیوں کو سلام پیش کریں گے جو سچائی کے علمبردار ہیں: بلاول بھٹو زرداری نے کہا کہ عہد کریں کہ ہم ان بہادر صحافیوں کے حقوق کا دفاع کریں گے اور ایسا پاکستان تعمیر کریں گے جہاں صحافی آزادی، وقار اور امید کے ساتھ کام کریں۔
