اسلام آباد(رپورٹنگ آن لائن)وزیر دفاع خواجہ آصف کا کہنا ہے کہ بشریٰ بی بی سابق انٹیلی جنس سربراہ جنرل فیض حمید کیلئے کام کرتی تھیں، بشریٰ بی بی کی دی گئی معلومات چند روز میں درست ثابت ہو جاتی تھیں، جنرل فیض اور جنرل باجوہ نے اس عورت کو پلانٹ کیا.
اب یہ بھی پتا چلنا چاہیے کہ گوگی کہاں سے آئی اور کہاں چلی گئی۔ایک انٹرویومیں خواجہ آصف نے اکانومسٹ کی خبر کو درست قرار دیتے ہوئے کہا کہ بانی پی ٹی آئی مکمل طور پر فیض حمید اور جنرل باجوہ کے کنٹرول میں تھے، جنرل عاصم منیر کی رپورٹ پر بانی پی ٹی آئی نے ناراض ہو کر انہیں ہٹا دیا تھا۔انہوں نے کہا کہ پاکستان کے ساتھ سنگین مذاق کیا گیا، طاقت کیلئے ایک خاتون کو لانچ کیا گیا.
چار پانچ سال کی لوٹ مار ایک منصوبے کے تحت کی گئی۔ انہوںنین کہاکہ لوٹ مار کے پیسے سے بانی پی ٹی آئی کو حصہ ملتا تھا، باقی پیسہ باہر گیا۔وزیر دفاع نے کہاکہ نواز شریف کے خلاف سپریم کورٹ میں پلان کے تحت فیصلے ہوئے۔ وزیر دفاع نے کہاکہ پنجاب جیسے صوبے کے ساتھ سنگین مذاق ہوا، آکسفورڈ سے پڑھ کر بھی یہ سب کرنا افسوسناک ہے۔
وفاقی وزیر نے کہا کہ عدلیہ کے تبادلوں پر نیا قانون دنیا کے مطابق ہے، جسٹس منصور علی شاہ نے چیف جسٹس کے خواب دیکھے ہوئے تھے وہ نہ بن سکے، عدلیہ آزاد ہونی چاہیے مگرجسٹس ثاقب نثار اور جسٹس اعجاز الاحسن والے انداز میں نہیں۔خواجہ آصف نے کہا کہ فیض حمید عدالتوں اور بانی پی ٹی آئی دونوں کو کنٹرول کر رہے تھے۔ انہوںنے کہاکہ ملک کی کمانڈ جادو ٹونے کے حوالے کر دی گئی تھی، بشریٰ بی بی دشمن ملک کے ہاتھ لگ جاتیں تو سنگین خطرات پیدا ہوسکتے تھے۔
وزیر دفاع خواجہ آصف نے کہا کہ پی ٹی آئی کو دی اکانومسٹ کیخلاف برطانیہ میں کیس کرنا چاہیے۔ خواجہ آصف نے سابق خاتون اول بشریٰ بی بی سے متعلق کہا کہ جنرل فیض اور جنرل باجوہ نے اس عورت کو پلانٹ کیا، اب یہ بھی پتا چلنا چاہیے کہ گوگی کہاں سے آئی اور کہاں چلی گئی؟۔انہوںنے کہاکہ بیرسٹر گوہر نے اگر عدالت جانا ہے تو ضرور جائیں، اگر بیرسٹر گوہر عدالت نہیں جائیں گے تو پھر میں چلا جاؤں گا، دی اکانومسٹ کوئی عام جریدہ نہیں ہے، یہ ثابت ہونا چاہیے کہ عدالتوں نے بھی اس خبر کی تصدیق کر دی ہے۔
