کراچی(رپورٹنگ آن لائن)امیرِ جماعتِ اسلامی کراچی منعم ظفرخان نے کہا ہے کہ اس بار شہر میں حادثات کا سلسلہ جاری ہے، گل پلازا کے بعد متعدد واقعات ہوئے، حکومت کی نا اہلی ہے،پیپلز پارٹی، ایم کیو ایم ہم نوالہ ہم پیالہ رہے ہیں، وسائل، اختیارات اور اداروں پر بھی قبضہ ہے۔
ادارہ نور حق میں پریس کانفرنس کرتے ہوئے انہوں نے کہا کہ سانحہ گل پلازا کو ایک ماہ سے زائد عرصہ ہو چکا، تعین نہیں کیا گیا کہ اس میں کتنے لوگ جاں بحق ہوئے۔انہوں نے کہا کہ 14 فروری کو ہم پر لاٹھی چارج اور شیلنگ کی گئی، انسدادِ دہشت گردی کے مقدمے بنائے گئے، لیکن ہمارے لوگوں نے صبر سے کام لیا، آج بھی ہمارے لوگ پرعزم ہیں کہ اس تحریک کو آگے بڑھائیں گے۔
منعم ظفر نے کہاکہ رمضان میں 50 فیصد سے زائد آبادی میں پانی موجود نہیں، اب تو عدالت بھی کہتی ہے کہ ٹینکرز کے ذریعے نہیں بلکہ نلکوں کے ذریعے پانی دیں، شہر کے لیے با اختیار بلدیاتی نظام ان کے پاس موجود نہیں ہے۔انہوں نے کہا کہ پیپلز پارٹی، ایم کیو ایم ہم نوالہ ہم پیالہ رہے ہیں، وسائل، اختیارات اور اداروں پر بھی قبضہ ہے، ایس بی سی اے بنایا گیا تو یہی لوگ شامل تھے، کراچی ٹرانسپورٹ کارپوریشن کو جب بند کیا گیا تو ایم کیو ایم کے وزیر تھے۔امیرِ جماعتِ اسلامی کراچی نے کہا کہ سڑکوں کی صورتِ حال سب کے سامنے ہے، گرین لائن منصوبہ 2016 میں شروع ہوا، جو اب تک مکمل نہیں ہوا، ادھر جہانگیر روڈ کی وجہ سے لوگ مشکل میں ہیں۔انہوں نے کہاکہ پورے پاکستان میں مضبوط شہری حکومتیں ہونی چاہئیں، آئین میں صوبوں کی تقسیم کا طریقہ کار موجود ہے۔
