لاہور (رپورٹنگ آن لائن) صوبائی وزیر اطلاعات پنجاب عظمیٰ بخاری نے کہا ہے کہ الحمدللہ آج دنیا کی نظریں پاکستان پر ہیں۔
اپنے بیان میں عظمیٰ بخاری کا کہنا تھا کہ ایران اور امریکا کے درمیان سیز فائر میں پاکستان کا مثبت اور مؤثر کردار ایک بڑی سفارتی کامیابی ہے، درست سیاسی و سفارتی حکمت عملی کے باعث پاکستان اپنا کھویا ہوا مقام دوبارہ حاصل کر رہا ہے۔
صوبائی وزیر اطلاعات نے کہا کہ وزیراعظم شہباز شریف کی قیادت اور فیلڈ مارشل عاصم منیر کی پیشہ ورانہ صلاحیتوں نے ثابت کر دیا ہے کہ پاکستان نہ صرف خطے بلکہ دنیا میں امن کا ایک اہم ستون بن چکا ہے۔
عظمیٰ بخاری نے کہا کہ افسوس کے ساتھ کہنا پڑتا ہے کہ سوشل میڈیا پر ایک مخصوص ٹولہ اس کامیابی پر بھی ناخوش ہے، جو ہر مثبت پیش رفت کو متنازع بنانے کی کوشش کرتا ہے، عوام کو دیکھنا چاہیے کہ کون عناصر پاکستان کی ہر کامیابی سے ناخوش ہو کر منفی رویہ اختیار کرتے ہیں۔
ان کا مزید کہنا تھا کہ ایک وقت تھا جب پاکستان کو ڈیفالٹ کی خبروں سے جوڑا جاتا تھا، مگر آج پاکستان ایک ذمہ دار اور باوقار عالمی طاقت کے طور پر ابھر رہا ہے۔
