ممبئی (رپورٹنگ آن لائن) بالی ووڈ اداکار اکشے کمار کی فلاپ فلموں کی تعداد بڑھنے لگی، 4 سال کے دوران ان کی ناکام فلموں کی تعداد اب 9 ہو گئی ہے۔
بھارتی میڈیا کے مطابق اکشے کمار اور رادھیکا مدن کی یہ نئی فلم ریلیز ہوئی، بڑے بجٹ اور بڑے ناموں کے باوجود یہ فلم باکس آفس پر اچھی کارکردگی نہیں دکھا سکی۔بھارتی میڈیا کے مطابق حال ہی میں اکشے کمار کی کئی فلمیں فلاپ ہو چکی ہیں اور اب سرپھرا کے بزنس کو دیکھ کر بھی یہی کہا جا سکتا ہے کہ یہ اکشے کمار کی نویں فلاپ فلم ہے۔
پچھلے سال اکشے کمار او ایم جی 2 میں ایک چھوٹے سے کردار میں نظر آئے تھے، یہ فلم ہٹ ثابت ہوئی تھی لیکن اس میں مرکزی کردار پنکج ترپاٹھی نے نبھایا تھا۔بھارتی میڈیا کے مطابق اکشے کمار کی آخری ہٹ فلم 2021 میں ریلیز ہونے والی سوریا ونشی تھی جس کے بعد ان کے فلموں کے فلاپ ہونے کا سلسلہ شروع ہوا۔بھارتی میڈیا کے مطابق اکشے کمار کی اترنگی رے، بچن پانڈے، سمراٹ پرتھویراج، رکشا بندھن، رام سیٹو، سیلفی، مشن رانی گنج، بڑے میاں چھوٹے میاں اور اب سر پھرا جیسی فلمیں فلاپ ہو چکی ہیں۔
