اسلام آباد (این این آئی)اسلام آباد ہائیکورٹ نے علیم خان کی ہائوسنگ سوسائٹی کیخلاف زمینوں پر مبینہ قبضہ کیس میں سی ڈی اے حکام کی عدم پیشی پر برہمی کااظہار کرتے ہوئے کہاہے کہ علیم خان کی سوسائٹی کے خلاف اس عدالت کے سامنے روز درخواستیں آ رہی ہیں، بادی النظر میں سی ڈی اے نے اپنی زمین کو ہتھیانے کا خود علیم خان کی سوسائٹی کو اختیار دے رکھا تھا ۔
ہفتہ کو دور ان سماعت چیف جسٹس اطہرمن اللہ نے کہاکہ سی ڈی اے اور چیف کمشنر جواب دیں کس قانون کے تحت یہ اختیار پرائیویٹ آدمی کو دیا گیا ۔ عدالت نے کہاکہ چیف کمشنر اسلام آباد بتائیں کیسے ایک پرائیویٹ سوسائٹی کو قانون ہاتھ میں لینے کی اجازت دی گئی؟ چیف کمشنر اسلام آباد اپنا نمائندہ مقرر کریں جو اس عدالت میں پیش ہو کر جواب دے ۔
