تہران/انقرہ (رپورٹنگ آن لائن)ترک وزیرِ خارجہ حاقان فدان نے کہا ہے کہ ایسے اشارے مل رہے ہیں کہ اسرائیل ایران پر حملے کا موقع تلاش کر رہا ہے جو خطے کو مزید عدم استحکام کی طرف لے جا سکتا ہے۔
ترک نشریاتی ادارے کو انٹرویو کے دوران حاقان فدان نے کہا کہ امید ہے اسرائیل کوئی اور راستہ اختیار کرے گا تاہم حقیقت یہ ہے کہ خاص طور پر اسرائیل ایران پر حملے کے لیے حالات کا جائزہ لے رہا ہے۔ انہوں نے واضح کیا کہ یہ اِن کا یہ اندازہ زیادہ تر اسرائیل کے حوالے سے ہے نہ کہ امریکا کے۔وزیرِ خارجہ حاقان فدان نے مزید کہا کہ حالیہ دورہ تہران کے دوران انہوں نے ایرانی قیادت کو بطور دوست اپنے خدشات سے آگاہ کیا تھا۔
انہوں نے کہا کہ دوست کڑوا سچ بھی کہہ سکتا ہے۔دوسری جانب ایک سینئر ایرانی عہدیدار نے بتایا کہ ایران اپنے دشمنوں کی جانب سے کسی بھی حملے کو مکمل جنگ تصور کرے گا۔ ان کا کہنا تھا کہ اگر امریکا نے ایران کی خودمختاری اور علاقائی سالمیت کی خلاف ورزی کی تو بھرپور جواب دیا جائے گا۔ امریکی فوجی سرگرمیوں کے پیش نظر ایران ہائی الرٹ پر ہے اور کسی بھی قسم کے حملوں کا، چاہے وہ محدود ہو یا وسیع، سخت جواب دیا جائے گا۔
