رپورٹنگ آن لائن۔
ایکسائز ٹیکسیشن اینڈ نارکوٹکس کنٹرول ڈیپارٹمنٹ لاہور کے جوہرٹاون آفس میں رواں سال کے پہلے پانچ ماہ کے دوران ایک ہزار سے زائد آٹو رکشے بوگس کوائف کے تحت رجسٹرڈ کئے جانے کا انکشاف سامنے آیا تو متعلقہ ڈائیریکٹر موٹرزلاہور قمر الحسن سجاد چہیتے جونئیر کلرک کاشف کلیم کو بچانے کے لیئے میدان میں آگیا ہے۔
معلوم ہوا ہے کہ ڈائریکٹر موٹرزلاہور قمرالحسن سجاد نے eye washکے لئے فوری طور پر جونئیر کمپیوٹر آپریٹر کاشف کلیم اور اس کے متعلقہ انسپکٹر وسیم بٹ کے خلاف چارج شیٹ تیار کرکے ڈائیریکٹر ایکسائز لاہور ریجن اے کو ڈرافٹ چارج شیٹ ارسال کردی ہے۔حالانکہ جونئیر کمپیوٹر آپریٹر کے خلاف اتھارٹی ڈائیریکٹر کی بجائے ڈی جی ایکسائز ہے اور ڈرافٹ چارج شیٹ ڈی جی کو ارسال کی جانی تھی۔
قمرالحسن سجاد نے اسی پر اکتفا نہیں کیا بلکہ ڈرافٹ چارج شیٹ میں مذکور جونئیر کمپیوٹر آپریٹر کاشف کلیم کے جرم کی نوعیت ہی بدل دی ہے۔اور چارج شیٹ میں جعلسازی کی بجائے رجسٹریشن میں تاخیر اور pendency کو موضوع بنایا ہے۔
حالانکہ جے سی او کاشف کلیم پر الزام ہے کہ اس نے نے یکم جنوری 2022 سے 31 مئی 2022 تک محض پانچ ماہ کے دوران این او سی اور لائسنس نہ رکھنے والی مختلف کمپنیوں کے ایک ہزار سے زائد آٹو رکشے این او سی اور valid licence رکھنے والی آٹو رکشہ مینو فیکچرنگ کمپنی تیز رفتار(Tez Raftar) کے نام سے غیر قانونی طور پر رجسٹرڈ کردیئے ہیں۔جس سے ان ایک ہزار سے زائد آٹو رکشوں کی قانونی حیثیت ختم ہو کر رہ گئی یے کیونکہ رکشے کسی دوسری کمپنی نے تیار کئے ہیں جبکہ ایکسائز ڈیپارٹمنٹ کے کمپیوٹر ریکارڈ میں انہیں تیز رفتار کے نام سے فیڈ کیا گیا ہے۔جس سے عملی طورپر سادہ لوح غریب شہریوں کے یہ آٹو رکشے جعلی ہوگئے ہیں۔
یہی نہیں بلکہ ان آٹو رکشوں کی رجسٹریشن کے وقت کلاس بھی تبدیل کی گئی ہے۔جس سے قومی خزانے کو بھی بھاری نقصان کا سامنا ہے۔
یہ بھی الزام ہے کہ مذکورہ جونئیر کمپیوٹر آپریٹر کاشف کلیم نے VICS کی بجائے ان ایک ہزار آٹو رکشوں کے بوگس فزیکل فٹنس سرٹیفکیٹ بھی لف کئے ہیں۔جس سے پاسنگ کی مد میں بھی خزانے کو بڑا نقصان پہنچایا گیا ہے۔
یہ بھی الزام ہے کہ Three Seater اور موٹر سائیکل کے طوپر رجسٹرڈ کیئے جانے والے ایک ہزار سے زائد آٹو رکشوں کی بڑی تعداد تھری سیٹرز کی بجائے Seven Seater ہے۔جن کی قانون کے مطابق رجسٹریشن ہو ہی نہیں سکتی۔لیکن مذکورہ جونئیر کمپیوٹر آپریٹر نے دھڑلے سے یہ غیر قانونی اور بوگس کارروائی کی ہے۔
اور متعلقہ کمپنیوں کے لائسنسوں اور این او سیز کی تجدید و اجرا کی مد میں وفاق و صوبائی اداروں کو موصول ہونے والے کروڑوں روپے کے ریونیو کا بھی نقصان کیا گیا ہے۔
اور جعلسازی سامنے آنے پر متعلقہ ایم آر اے زاہد حسین نے جونئیر کمپیوٹر آپریٹر کاشف کلیم کو شوکاز نوٹس جاری کرتے ہوئے اس سے 3 یوم کے اندر جواب طلبی کر رکھی یے۔لیکن مذکورہ شخص اسے جواب دینے کو تیار نہیں ہے۔
تاہم ڈائیریکٹر موٹرز قمرالحسن سجاد نے ڈرافٹ چارج شیٹ میں ای ٹی او مذکورہ کی طرف سے جاری کردہ شوکاز نوٹسز کا ذکر تو کیا ہے تاہم شوکاز میں بیان کیئے جانے والے الزامات کی بجائے pendency کا ایشو بنانے کی کوشش کی ہے۔
ادھر ذرائع نے الزام عائد کیا ہے کہ جونئیر کمپیوٹر آپریٹر کاشف کلیم نے فی کس آٹو رکشہ بوگس رجسٹریشن کے عوض 20 ہزار روپے رشوت موصول کی ہے۔ اور اس کے اس غیرقانونی عمل میں وہ افسروں کو بھی مبینہ طورپر حصہ دیتا ہے۔یہی وجہ ہے کہ جعلسازی کا علم ہونے کے باوجود کوئی بھی افسر اس کے خلاف کارروائی نہیں کر رہا۔
