اسلام آباد (رپورٹنگ آن لائن)خاتونِ اول بی بی آصفہ بھٹو زرداری نے بیساکھی/ویساکھی کے موقع پر پاکستان اور دنیا بھر میں رہنے والے اپنے ہندو اور سکھ خاندانوں کو دلی مبارکباد پیش کرتے ہوئے کہاہے کہ دعا ہے بیساکھی/ویساکھی آپ کے لیے سکون، خوشی اور اپنے پیاروں کے ساتھ وقت گزارنے کا باعث بنے۔اپنے پیغام میں انہوںنے کہاکہ بیساکھی/ویساکھی کے اس پر مسرت موقع پر، میں پاکستان اور دنیا بھر میں رہنے والے اپنے ہندو اور سکھ خاندانوں کو دلی مبارکباد پیش کرتی ہوں۔
انہوںنے کہاکہ بیساکھی/ویساکھی کا تہوار ایک خاص اہمیت کا حامل ہے،یہ زمین کی فیاضی اور اْن رشتوں کا جشن ہے جو خاندانوں اور برادریوں کو آپس میں جوڑے رکھتے ہیں۔ یہ اْس فصل پر شکر ادا کرنے کا وقت ہے جو زندگی کو سہارا دیتی ہے، اور اْس محنت اور لگن کو خراجِ تحسین پیش کرنے کا موقع ہے جو اسے ممکن بناتی ہے۔انہوںنے کہاکہ اس موقع پر میں خاص طور پر ہمارے دیہی علاقوں کی خواتین کے بارے میں سوچتی ہوں، وہ مائیں، بیٹیاں اور بہنیں جو بے شمار ذمہ داریاں اپنے کندھوں پر اٹھائے ہوئے ہیں،طویل اور کٹھن موسم میں، وہ کھیتوں اور گھروں کے درمیان مسلسل مصروف رہتی ہیں اور دونوں کو بغیر کسی وقفے کے سنبھالتی ہیں، اْن کی طاقت اور ذمہ داری غیر معمولی ہوتی ہے، جس کا اکثر ذکر نہیں کیا جاتا۔
انہوںنے کہاکہ جب راستے طویل ہوں، وسائل محدود ہوں اور دن بے حد مشقت طلب ہوں، تب بھی وہ محبت اور وقار کے ساتھ اپنے خاندانوں کو جوڑے رکھنے کا ہنر جانتی ہیں۔ یہ ایک ایسی ذمہ داری ہے جو پہچان اور ستائش کی مستحق ہے۔انہوںنے کہاکہ خاندان ہر فصل کا مرکز ہوتے ہیں اور ہر گھر کی مضبوطی ہی دراصل کسی بھی معاشرے کی روح کی عکاس ہوتی ہے، جب خاندان کئی ہفتوں کی محنت کے بعد اس موسم کو اکٹھے منا پاتے ہیں، تو یہ واقعی ایک قابلِ قدر نعمت ہے۔
انہوںنے کہاکہ میں اپنے ہندو اور سکھ بھائیوں اور بہنوں کے لیے بھی دلی احترام اور نیک تمناؤں کا اظہار کرتی ہوں جو اس دن عبادت اور خوشیوں میں شریک ہوتے ہیں۔ آپ کی روایات، آپ کی عقیدت اور آپ کا اجتماعی جذبہ ہمارے ملک کی خوبصورت اور متنوع شناخت کا ایک قیمتی حصہ ہیں۔انہوںنے کہاکہ میری دعا ہے کہ بیساکھی/ویساکھی آپ کے لیے سکون، خوشی اور اپنے پیاروں کے ساتھ وقت گزارنے کا باعث بنے،جب محنت کا موسم خوشیوں میں بدلتا ہے، تو میں امید کرتی ہوں کہ آپ کے گھر ہنسی، برکتوں اور باہمی گرمجوشی سے بھر جائیں۔انہوںنے آخر میں کہاکہ بیساکھی/ویساکھی مبارک ہو۔
