اسلام آباد (رپورٹنگ آن لائن)پاکستان مسلم لیگ (ن) کے سینیٹر پرویز رشید نے کہا ہے کہ پوری قوم کو غیرقانونی دھرنوں اور لشکر کشی کے خلاف متحد ہونا ہوگا۔
پارلیمنٹ ہاؤس کے باہر میڈیا سے گفتگو کے دوران پرویز رشید نے کہا کہ طاقت کے ذریعے مطالبے قبول نہیں، قانون کا راستہ اپنائیں، سڑکوں پر لشکرکشی سے ملک انتشار کی طرف جائے گا، ملاقاتیں صرف عدالتی حکم کے تحت ہی ہونی چاہئیں۔سینیٹر پرویز رشید نے کہا کہ اڈیالہ جیل کو پارٹی ہیڈکوارٹر بنانا غیرقانونی سمجھا گیا، دھرنوں اور شورشرابے سے عدلیہ کا راستہ بند نہیں کیا جا سکتا۔
انہوں نے کہا کہ خبردار! سڑکوں پر مقدمات لڑنے سے دہشتگردی کو فروغ ملتا ہے، سیاسی اختلافات کا حل پارلیمنٹ اور عدالتیں ہیں، طاقت نہیں۔پرویز رشید نے کہا کہ ملک کی سیاسی و اقتصادی سالمیت بچانے کے لیے قانون کی حکمرانی ضروری ہے۔
