لاڑکانہ (رپورٹنگ آن لائن)سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ دنیا کا سب سے بڑا ہائو سنگ پروگرام ایس پی ایچ ایف ایک سکیم سے بڑھ کرسماجی انقلاب بن چکا ہے۔ اب تک20لاکھ افراد کی ویری فکیشن مکمل ہو چکی ہے اور 15 لاکھ افراد کے اکا نٹس کھولے جا چکے ہیں بکہ مزید ساڑھے چھ لاکھ گھروں کی تعمیر آخری مراحل میں ہے۔ اپنےجاری بیان میں انہوں نے کہا ہے کہ ہائوسنگ پروگرام ایس پی ایچ ایف کے ذریعے دس لاکھ لوگوں کے لئے روزگار کے مواقع پیدا ہوئے ہیں اور نو لاکھ خواتین کو زمین کی ملکیت دی گئی ہے۔
شرجیل انعام میمن نے کہا کہ کراچی میں صاف پانی اور نکاسی آب کے لئے 38.5 ارب روپے مختص کئے گئے ہیں اور کے فور، حب، سٹارم واٹر ڈرین اور KWSSIP-II جیسے منصوبوں کے لئے فنڈز بھی جاری ہو چکے ہیں۔ حکومت سندھ اپنے ترقیاتی ایجنڈے پر تیزی سے کام کر رہی ہے اور واٹر، سینی ٹیشن اور میونسپل سروسز کی 293سکیمیں منظور کی جا چکی ہیں۔ وزیراعلیٰ سندھ نے تمام منصوبوں کے لئے بروقت فنڈ ریلیز کی ہدایات بھی دی ہیں۔ انہوں نے کہا کہ شہری اور دیہی علاقوں میں سڑکوں اور رابطہ نظام کی بہتری پر پیش رفت جاری ہےوزیراعلیٰ اب تک چھ سو بیس روڈ منصوبوں کا جائزہ لے چکے ہیں۔
کورنگی کاز وے برج، انڈر پاسز اور لیاری ٹرانسفارمیشن منصوبہ بھی تکمیل کے قریب ہیں، ساتھ ہی970کلومیٹر سڑکوں کی بحالی پر کام جاری ہے۔سینئر وزیر شرجیل انعام میمن نےکہا کہ ملازمت پیشہ خواتین اور طالبات کے لئے الیکٹرک بائیکس کی تعداد بڑھانے کی منظوری دے دی گئی ہے، سندھ سولر انرجی پراجیکٹ سمیت پچیس ارب روپے کے رینیوایبل انرجی اقدامات پر عمل شروع ہو چکا ہے۔ سندھ حکومت کا وژن استحکام،خوشحالی اور مساوات پر مبنی ہے اور اسی مقصد کے تحت ترقیاتی سرگرمیاں صوبے بھر میں جاری ہیں۔
