شہباز اکمل جندران۔۔۔
پنجاب ٹیکسٹ بک بورڈ کی چھٹی جماعت کی اسلامیات کی کتاب میں سامنے آنے والی بھیانک اور ناقابل قبول غلطی سامنے آنے کے بعد ایک اور بڑا بلنڈر سامنے آ گیا ہے۔
معلوم ہوا ہے کہ پنجاب کریکولم اینڈ ٹیکسٹ بک بورڈ نے بورڈ آف گورنرز کے فیصلے اور اپنے ہی ضابطے و نوٹیفکیشنز کو نظر انداز کرتے ہوئے۔چھٹی،ساتویں اور آٹھویں جماعت کی اسلامیات کی کتابوں کا متحدہ علما بورڈ سے ریویو (External Review)نہیں کروایا حالانکہ پہلی سے پانچویں جماعت تک کی تمام کتابوں کا ریویو متحدہ علما بورڈ سے کروایا گیا ہے۔
ذرائع کے مطابق پی سی ٹی بی کے ڈائریکٹر مینوسکرپٹ اور ایم ڈی نے کئی برسوں سے وفاق کے نصاب کے تحت چھپنے والی چھٹی، ساتویں اور آٹھویں جماعت کی اسلامیات میں ترمیم اور تبدیلی کے باوجود ریویو نہ کروانے کا فیصلہ کیا۔
متحدہ علما بورڈ سے ریویو نہ کروانے کے نتیجے میں بورڈ کی تعلیمی سال 2021-22کے لئے شائع ہونے والی نئی کتابوں میں کئی سنگین غلطیاں پائی گئی ہیں۔جنہیں دبانے کی کوشش کی جارہی یے۔
زرائع سے معلوم ہوا ہے کہ پنجاب کریکولم اینڈ ٹیکسٹ بک بورڈ لاہور نےچھٹی کلاس کی 2021-2022 کی اسلامیات، جغرافیہ اور تاریخ کی سرکاری سکولوں میں مفت تقسیم کی جانے والی جیکٹ کے صفحہ 35 پر حضور نبی اکرم (ص) کے لئے درود وسلام کے مخصوص الفاظ “صلی اللہ علیہ وسلم” آپ(ص) کے صاحبزادے حضرت ابراہیم علیہ السلام کے لئے لکھ دیے ہیں۔
سیرت طیبہ کے باب سوئم میں فرماں رواں کو دعوت اسلام کے عنوان سے شروع ہونے والے سوال میں صفحہ 35 پر حضور نبی اکرم صلی اللہ علیہ وسلم کے صاحبزادے حضرت ابراہیم علیہ السلام کے نام کے ساتھ صلی اللہ علیہ وسلم سمیت درود و سلام کا مکمل جملہ لکھا گیا ہے۔
کتاب میں دی جانے والی تفصیلات کے مطابق مسودے کی نگرانی بورڈ کے سبجیکٹ سپیشلسٹ ڈاکٹر فخر زمان نے کی۔جبکہ عبداللہ فیصل اس کے ڈائیریکٹر بتائے جاتے ہیں۔کتاب مکتبہ معین الادب اور ایک دیگر پرنٹر نے پرنٹ کی۔اورکتاب کا ڈویلپرز اردو بک سٹال ہے۔کتاب کے تین مصنف ڈاکٹر محمد اعجاز، عثمان احمد اور منزہ ظہیر ہیں۔
ذرائع کے مطابق ایم ڈی پی سی ٹی بی فاروق منظور نے ڈائیریکٹر مسودات، نگران،پبلشرز، پرنٹر،ڈویلپراور مصنف سمیت کسی کو بھی غلطی کا ذمہ دار ٹھہرایا ہے نہ ہی کسی کے خلاف انکوائری شروع کی ہے۔
حالانکہ اس سے قبل مطالعہ پاکستان کلاس نہم میں اسی نوعیت کی ایک غلطی سامنے آنے پر پنجاب ٹیکسٹ بک بورڈ کے اس وقت کے ایم ڈی افضال احمد کے احکامات پر کتاب کے مصنف و دیگر کے خلاف توہین رسالت کا مقدمہ درج کروایا گیا تھا۔
