اسلام آباد(رپورٹنگ آن لائن)صدرِ مملکت آصف علی زرداری نے کہا ہے کہ مسلمانوں کی سیاسی نمائندگی اور اسلامی اقدار پر مبنی علامہ محمد اقبالؒ کے معاشرتی اصولوں نے پاکستان کی قومی شناخت پر انمٹ نقوش چھوڑے ہیں، آج ہم علامہ محمد اقبالؒ کا یومِ پیدائش منا رہے ہیں، شاعرِ مشرق اور مفکر کے وژن نے برصغیر کے مسلمانوں میں آزادی اور خود ارادیت کا شعور بیدار کیا۔
ایوان صدر کےمیڈیا ونگ کے مطابق صدرِ مملکت نے علامہ محمد اقبالؒ کے یومِ پیدائش کے موقع پر اپنے پیغام میں کہا کہ 1930 میں مسلم لیگ کے سالانہ اجلاس سے اپنے تاریخی خطاب میں علامہ اقبالؒ نے مسلمانوں کے حقوق کے تحفظ کی ضرورت پر زور دیا جو بعد ازاں ایک خودمختار مملکت کی بنیاد بنا۔ صدرِ مملکت نے کہا کہ اقبالؒ کا فکری و ادبی ورثہ صرف ان کی شہرۂ آفاق تصانیف اسرارِ خودی، رموزِ بے خودی اور بانگِ درا تک محدود نہیں بلکہ اس ورثہ میں خودی، روحانیت اور آزادی جیسے گہرے موضوعات کا احاطہ کیا گیا ہے۔
انہوں نے کہا کہ مسلمانوں کی سیاسی نمائندگی اور اسلامی اقدار پر مبنی ان کے معاشرتی اصولوں نے پاکستان کی قومی شناخت پر انمٹ نقوش چھوڑے ہیں۔ صدر مملکت نے کہا کہ ہم جب اس غیر معمولی شخصیت کو خراجِ عقیدت پیش کرتے ہیں تو اس عزم کی تجدید بھی کرتے ہیں کہ ہم ان کے اصولوں کی پیروی کرتے ہوئے ایک خوشحال، پُرامن اور متحد پاکستان کی تعمیر کے لیے کوشاں رہیں گے۔
انہوں نے کہا کہ ہم اقبالؒ کی زندگی اور تعلیمات سے رہنمائی حاصل کریں اور ایک روشن مستقبل کے لیے یکجا ہو کر کام کریں۔ صدر مملکت نے کہا کہ اللہ کرے کہ اقبالؒ کی بصیرت ہماری ترقی کے لئے مشعل راہ بنی رہے اور ان کا فکری ورثہ آنے والی نسلوں کے لیے ہمیشہ باعثِ تحریک بنا رہے۔
