بیجنگ (رپورٹنگ آن لائن) چین میں ہونے والی ایک تحقیق میں یہ بات سامنے آئی ہے کہ کووڈ۔19 سے صحت یاب ہونے والے ایسے تمام مریض جن میں علامات ظاہر ہوئیں یا نہیں ہوئیں، میں اینٹی باڈیز کا لیول دو سے تین مہینوں میں تیزی سے نیچے آتا ہے۔
برطانوی سائنسی جریدے ’نیچر میڈیسن‘ میں شائع ہونے والی اس ریسرچ سے ’امیونٹی پاسپورٹ‘ کو استعمال کرنے کے رسک سامنے آئے ہیں۔ تحقیق کے نتائج اس بات کو بھی سپورٹ کرتے ہیں کہ سماجی فاصلہ اور ہائی رسک گروپس کو ایک لمبے عرصے تک آئسولیٹ کرنا ہوگا۔
اس ریسرچ میں کووڈ۔19 سے صحت یاب ہونے والے 37 علامات والے اور 37 بغیر علامات والے مریضوں کا جائزہ لیا گیا اور اس سے معلوم ہوا کہ وہ مریض جن میں آئی جی جی مثبت پایا گیا ان میں سے 90 فیصد میں یہ دو سے تین مہینے میں تیزی سے نیچے آ گیا۔ علامات اور بغیر علامات کے مریضوں میں مجموعی طور پر یہ کمی 70 فیصد ریکارڈ کی گئی ہے۔ اس تحقیقی کے نتائج سے ایک نئے سوال نے جنم لیا ہے کہ اس وائرس کے خلاف انسان میں قوت مدافعت کب تک ساتھ دے سکتی ہے۔
یہ تحقیق چائنیز سنٹر فار ڈیزیز کنٹرول اینڈ پری وینشن کی ایک برانچ چانگ چنگ یونیورسٹی میں کی گئی ہے اور ہانگ کانگ یونیورسٹی میں وائرالوجی کے پروفیسر جن ڈونگ یان، جو اس ریسرچ کا حصہ نہیں تھے، کا کہنا ہے کہ اس تحقیق میں اس بات کی نفی نہیں کی گئی کہ امیون سسٹم کے دیگر حصے تحفظ فراہم نہیں کرتے۔
پروفیسر جن ڈونگ یانکا کہنا تھا کہ کچھ خلیے پہلی انفیکشن کے وقت یہ یاد رکھتے ہیں کہ دوسری انفیکشن سے کیسے نمٹنا ہے۔انہوں نے کہا کہ سٹڈی کیے جانے والے مریضوں کی تعداد بہت تھوڑی تھی۔
